- Este evento ha pasado.
Conceyu Abiertu del grupu municipal SOMOS Carreño-PODEMOS
03/06/2021- 7:00 pm - 9:00 pm
Nel mes de mayu llegamos al ecuador de la llexislatura, pasaron dos años dende les eleiciones municipales de 2019. Nestos últimos meses, el nuestru grupu municipal nun dexó de trabayar pol interés xeneral del conceyu. Mes a mes fueron asocediendo acontecimientos y pensamos que ye momentu de que mos axuntemos y tengamos la oportunidá de falar sobre ellos y compartir impresiones, esmoliciones y propuestes.
Vamos recuperando adulces el pulsu de la normalidá, anque l’actividá nun paró en nengún momentu. Esto quier dicir qu’en non poques ocasiones fuimos tomando decisiones col escasu tiempu que los ritmos institucionales dexen pa poder compartir y aldericar cola nuestra xente.
Pa dar un pasu pa recuperar los nuestros contactos presenciales convidámosvos a participar nel conceyu abiertu que vamos tener el próximu xueves, 3 de xunu, na Casa la Cultura de Candás a les 19:00 hores.
Ye posible que’l tema más importante que nos prestaría compartir con vosotres y vosotros sía’l de la tramitación del Plan Xeneral d’Ordenación Urbana de Carreño (PXOU), a la que presentamos alegaciones nel periodu d’Información Pública de forma conxunta con Izquierda Xunida. Queremos compartir cómo foi’l procesu de trabayu pa redactar eses alegaciones y tamién ofrecevos un resume del so conteníu. Pensamos que nun hai nestos momentos fechu más trascendente pa la xente de Carreño y queremos que participéis y qu’opinéis.
Amás de falar sobre’l PXOU, proponemos dexar espaciu pa compartir de manera abierta otres cuestiones que vos esmolezan, propuestes que puedan ser d’interés o cualesquier otru asuntu que queráis planteganos. Paeznos qu’una parte importante del nuestru trabayu tien de sometese al vuestru escrutiniu, buscando siempres meyorar el nuestru llabor.
Van aplicase les midíes sanitaries indicaes pol protocolu covid: aforu llimitáu, usu de mázcara obligatoriu, distancia de seguridá, xel hidroalcohólicu y ventilación.
Conceyu Abiertu del grupu municipal SOMOS Carreño-PODEMOS
Xueves, 3 de xunu de 2021. Casa la Cultura de Candás. 19:00 h.