Biografía
Tengo 39 años y trabayo como Inxenieru Técnicu Forestal na Conseyería de Agroganadería y Recursos Autóctonos. A principios de los años noventa, cuando estudiaba nel IES de Candás, entamé la mio actividá militante nel asociacionismu xuvenil de Carreño, siendo sociu fundador del Ensame Xuvenil Trisquel. Les ganes de da-y un xiringón a la vida social y cultural del conceyu, llevonos a desendolcar munches actividades, ente elles les primeres Nueches Celtes de Candás. Estudié na Universidá de Santiago de Compostela, onde participé activamente nel movimientu estudiantil dientru de los Comités Abertos de Facultade. Ya de vuelta n’Asturies, entamé la mio vida llaboral combinando varios trabayos a tiempu parcial cola militancia activa nes diferentes espresiones de la izquierda soberanista asturiana. Con motivu de la reunión del Ecofin n’Uviéu nel añu 2002, collaboré col Movimientu Antiglobalización d’Asturies. Dende fai cuatro años, formo parte de la Xunta de Personal Funcionariu de l’alministración autonómica pola Corriente Sindical d’Izquierda. Nel campu profesional, tengo la suerte de trabayar nun mundu que me gustó dende bien neñu: l’agroforestal y ganaderu. Actualmente, soi responsable técnicu d’una comarca forestal, ocupación que faime pasar bona parte del mio tiempu llaboral pelos montes del suroccidente asturianu. Esti fechu nun impide que siga implicao activamente nel texíu asociativu de Carreño, centrándome nos últimos años na puesta en marcha de la asociación Reciella: families pol asturianu, dedicada a reforzar la tresmisión interxeneracional de la llingua asturiana nel ámbitu social y familiar.