ALCUERDU ELECTORAL CON IZQUIERDA XUNIDA DE CARREÑO
ACTU DE PRESENTACIÓN DEL PROYECTU 2018 POLA OFICIALIDÁ DEL ASTURIANU
El 23 de setiembre que vien la Xunta pola Defensa de la Llingua Asturiana va presentar la campaña PROYECTU 2018 pola oficialidá. El grupu municipal de SOMOS Carreño tamos convidaes al actu que se va celebrar a les 12 de la mañana nes instalaciones nueves de la que foi Escuela de Comerciu, na cai Tomás y Valiente de Xixón.
El respetu pola llingua asturiana ya caltrió ente los sectores más civilizaos de la sociedá, l’alfabetización de les xeneraciones más moces ye güei una realidá, agora falta esi reconocimientu oficial pa poder siguir el camín hacia la normalización de la llingua na vida de los asturianos y les asturianes. Urxe adaptar el marcu llegal del asturianu y del gallego-asturianu a la realidá del sieglu XXI: la normativa europea esíxelo, les nueves formes de comunicación fáenlo imprescindible.
Tamos nel ecuador d’una llexislatura qu’empezó cola esperanza del cambéu cola entrada na Xunta Xeneral de formaciones nueves. La reivindicación llingüística nun puede permitise repetir, a una escala más pequeña, de cuatro años, l’impás y la frustración de los más de 40 años de llucha que lleva esti movimientu. Los partíos que llevaron nel programa dalguna
declaración favorable a la oficialidá tienen que materializar esi determín nun proyectu de llei de reforma del Estatutu qu’igue d’una vez por toes esta situación irregular de la llingua asturiana en comparanza con otres llingües del Estáu. Ye namás cosa de voluntá, nun valen sides.
La Xunta pola Defensa de la Llingua Asturiana va poner l’asuntu llingüísticu na primer páxina de l’axenda política del país pal cursu qu’entra. Na presentación del día 23 va haber presencia de los Conceyos pola Oficialidá, plataforma que se creó hai un par d’años pa impulsar avances na normalización del usu minicipal de la llingua, que tán atopando llendes pol Gobiernu central pa desenvolver ordenances d’usu del asturianu o planes de normalización nel ámbitu de les sos competencies. Van tar tamién representaos los partíos políticos que llevaron nos programes la oficialidá de la llingua. Va haber espaciu pa que se visibilicen los
sectores favorables a la defensa de la llingua dientro de los partíos que nun quieren abrir esi debate internu.
Ellí vamos alcontranos tolos sectores de la sociedá asturiana no que queremos que sía una demostración cívica a favor de la oficialidá que nun se pueda callar nin facer de menos.
Nun faltes esi día. ¡Llegó la hora!
Artículos relacionados
