ALCUERDU ELECTORAL CON IZQUIERDA XUNIDA DE CARREÑO
LES MUYERES Y LA SEGUNDA REPÚBLICA
Un de los grandes llogros de la II República española foi estender la participación de la muyer na vida pública. Muyeres como Teresa Claramunt, María Cambrils, Soledá Gustavo, Emilia Pardo Bazán o Carmen de Burgos ‘Colombine’, ente otres munches, contribuyeron a les conquistes sociales mientres esti períodu. La República articuló un importante alderique al rodiu de los drechos de les muyeres y munches de les sos reivindicaciones viéronse satisfeches:
El drechu al votu.
Les muyeres yeren elexibles pero nun podíen escoyer naquelles elleiciones de xunu de 1931. Fueron diputaes naquella primer llexislatura Clara Campoamor, Victoria Kent y Margarita Nelken. Foi la diputada radical Clara Campoamor quien dinamizó l’alderique del drechu al votu.
L’accesu a la vida pública y a la educación.
La República fixo posible que les muyeres aportaren n’igualdá de condiciones llegales a la vida pública y a la educación. Victoria Kent foi nomada Direutora Xeneral de Prisiones. El so oxetivu, basáu nos trabayos desendolcaos con anterioridá por Concepción Arenal, foi la reinserción. Nel planu educativu’l desarrollu del maxisteriu per parte de les muyeres foi una de les razones de la meyora educativa de la República.
La conquista de drechos civiles.
La situación de sumisión de la muyer nos años precedentes empezó a revertir nos años republicanos. La llibertá individual foi n’aumentu y la lexislación tendió a la equiparación por aciu la promulgación de la primer Llei del Divorciu n’España y, yá cola Guerra Civil en marcha, promulgóse la Llei del Albuertu, por iniciativa de la ministra de Sanidá y Asuntos Sociales, l’anarquista Federica Montseny, col asesoramientu de personalidaes del movimientu llibertariu como Amparo Poch.
La estensión asociativa.
Los antecedentes de la organización de les muyeres funden los sos raigaños nel sieglu XIX. Toles organizaciones polítiques y sindicales desendolcaron mientres la República organizaciones específiques de muyeres. Inclusive la drecha más rancia desenvolvió el so asociacionismu femenín.
Ensin dubia nenguna la Segunda República convirtió a la muyer en protagonista, tres años de llucha pola conquista de los sos derechos. En tolos ámbitos de la vida les muyeres fueron ocupando’l llugar que-yos correspondía. El so accesu al mundu políticu, el so papel protagonista y dinamizador nes lluches sociales, les sos conquistes llaborales y llegales, converten a la Segunda República nel réxime que fizo posible el protagonismu de la muyer y el medrar del feminismu. El franquismu encargóse, a partir de 1939, de soterralo por mediu de los paredones d’execución, la cárcel, la represión y l’esiliu.
Artículos relacionados
