ALCUERDU ELECTORAL CON IZQUIERDA XUNIDA DE CARREÑO
ENTAMAMOS LA NEGOCIACIÓN DE LOS PRESUPUESTOS PA 2017
Esta selmana el grupu municipal de SOMOS CARREÑO entamaba la negociación presupuestaria de 2017 con un aconceyamientu col gobiernu municipal. Nesta primer toma de contactu, treslladárensenos los conteníos principales del documentu, que cuntará con una inversión aprosimada de 900.000 €, de los que unos 300.000 € tan destinaos a les propuestes de los presupuestos participativos.
Asina, la inversión sobre la que se tá negociando ye d’unos 600.000 €, nos que yá tan comprometíos varios proyectos urxentes na rede de saneamientu y depuración d’agues. Asina, apenes quedará una partida curiosa pa otres inversiones de caláo, teniendo que posponese la negociación de delles obres al remante.
Sicasí, el grupu municipal SOMOS CARREÑO punso enriba la mesa llínies de trabayu prioritaries y que pueden dividise en propuestes d’acción política (que nun necesiten necesariamente partida presupuestaria) y propuestes d’acción presupuestaria propiamente dicha, que necesariamente habrá que dotales.
Recordamos compromisos qu’arrecostinamos d’exercicios anteriores, como l’estudiu del ruío en Carreño, la recoyida selectiva de resíduos puerta a puerta, la puesta en marcha de los güertos ecolóxicos o la auditoría pa meyorar la eficiencia enerxética de los edificios públicos.
Como nueves propuestes p’abordar l’añu qu’entra, pidimos una convocatoria de beques públiques pal comedor escolar y que se de prioridá a cubrir la plaza vacante en servicios sociales. Tamién planteamos la necesidá d’abrir les meses de negociación laboral colos trabayadores públicos al conxuntu de fuerces polítiques y entamar la revisión de la relación de puestos de trabayu (RPT).
En mocedá, pedimos una solución a la falta d’espacios propios pa la mocedá en Carreño, pa ello proponemos alquilar parte del actual “Casino” pa esti fin, mentantu nun se cuente con una infraestructura propia. Tamién consideramos prioritariu salvar el “Rebolleres Rock”, firmando un conveniu colos organizadores que de estabilidá a la so financiación y aumentar la dotación pa la Banda de Música y Banda Gaites Candás. Tamién propusimos que la Casa Conceyu se comprometa col proyectu GUIFI.NET pa instalar na zona rural una rede de telecomunicaciones d‘alta capacidá, abierta, llibre y neutra.
En relación col patrimoniu cultural, propusimos abrir una convocatoria pública pa la reparación/restauración de horros y paneres. Pa la promoción del empléu, pedimos avances nel acondicionamientu d’un espaciu de coworking en Candás. Na estaya d’urbanismu, una de les actuaciones prioritaries tá relacionada cola necesidá d’un accesu peatonal al muelle, por eso pedimos que se presione nesti asuntu a la Conseyería competente. Tamién desiximos avanzar en proyectos d’implantación de víes verdes en Carreño y que se faigan llabores de llimpieza y meyora del solar d’Inocencio Rodríguez Solís mientres se redacta un proyectu de construcción de zona verde con aparcamientu inferior.
Toos estos temes, y los que puedar surdir, vamos aldericalos nuna asamblea ciudadana convocada pal prósimu miércoles 28 d’avientu, a les 19:00 na Casa la Cultura.
Artículos relacionados
