ALCUERDU ELECTORAL CON IZQUIERDA XUNIDA DE CARREÑO
CONCEYU ABIERTU DE SOMOS CARREÑO
El próximu martes 26 de setiembre a les 7 la tarde, na Casa la Cultura de Candás, verémosnos pa celebrar un Conceyu Abiertu-Asamblea Abierta de SOMOS Carreño, al cual táis convidaes y convidaos a participar.
Ente les temes que vamos plantegar primero vamos falar de la evolución del alcuerdu presupuestariu que SOMOS Carreño suscribió col equipu de gobiernu pa los presupuestos de 2017, en qué situación tán les distintes propuestes y el trabayu que se ta llevando a cabu. Otru asuntu importante, el remanente o superávit de presupuestu. Yá tuvimos una xunta col equipu de gobiernu pa treslladar les nueses propuestes y queremos que sepáis en qué situación tamos cola negociación pa consiguir faeles realidá.
Como yá vais saber siguimos ensin presupuestos en Carreño. Pa nós esta situación reflexa la incapacidá pa llegar a alcuerdos per parte del equipu de gobiernu. Los presupuestos municipales son una ferramienta fundamental onde se define que tipu d’acción política va llevar a cabu un gobiernu, al empar qu’amuesa los compromisos que ta dispuestu a asumir cola ciudadanía y coles vides de la xente. Por esi motivu’l nuesu grupu siempres va intentar que dientro de los presupuestos municipales de Carreño apaezan iniciatives del nuesu programa, programa fechu cola vuesa ayuda, el programa más completu de tolos qu’allegaron a les elecciones municipales.
Amás, queremos que sepáis qu’unu de los nuesos conceyales va dise de Asturies para siguir colos sos estudios. Por tanto, va dexar el puestu de conceyal, que va pasar a ser ocupáu por otra persona de la llista.
Con esta asamblea, pretendemos crear un espaciu de participación y alderique. Queremos poner de mancomún l’actividá que realizamos nel conceyu por que sirva de reflexón colectiva.
Si hai dalguna tema o cuestión que queráis plantegar, yá sía de cara a esta asamblea o en cualesquier otru momentu, les nueses canales de comunicación siempres tán abiertes. A la fin d’esta convocatoria ta la nuesa dirección de corréu electrónicu a la que podéis dirixir les vueses propuestes y consultes. Y visitar la nuesa páxina web, que la tamos currando y ta quedando bien guapa.
A lo último, recordar que yá ta disponible’l nuevu boletín informativu de SOMOS Carreño. Vamos Llevar unos cuantos a l’asamblea, y quien quiera puede pidir per corréu electrónicu y unviar de baldre a casa per corréu ordinariu.
Orde del día de l’asamblea:
- Evolución alcuerdu presupuestariu.
- Remanente presupuestariu 2017.
- Relevu d’unu de los nuesos conceyales.
- Ruegos, entrugues y propuestes.
Artículos relacionados
