SOMOS CARREÑO FAI BALANCE DE LOS SOS DOS AÑOS NES INSTITUCIONES

L’agrupación d’electores destaca les 10 principales midíes poles que puxó nel Conceyu de Carreño

Somos Carreño (agrupación d’electores nel conceyu avalada por Podemos) revolucionó la política hai dos años algamando cuatro conceyales na so primer apaición nunes elecciones. Pero esta candidatura d’unidá popular llegó pa quedase y puxar por acciones a favor de la ciudadanía, ente les que destaquen les de calter social y mediuambiental. Agora, nel ecuador de la llexislatura, fai balance. Estes son algunes de les principales midíes que punxeron sobre la mesa:

Estudiu del ruíu. Propuesta que naz d’un alcuerdu plenariu, deriváu d’una moción presentada por SOMOS Carreño y aprobada por mayoría nel añu 2015. Con cargu a la partida económica del Conseyu medioambiental de 2017, ta redactándose l’estudiu del ruíu de Carreño con un presupuetu de 30.000 euros.

Ayuda social. Propuesta d’ayuda social dirixida a los vecinos y vecines de Carreño con menores recursos económicos, pa facer frente a los gastos de la vivienda habitual, que se ven incrementaos por mor del pagu del Impuestu sobre Bienes Inmuebles (IBI).

Catálogu urbanísticu. Propuesta de revisión del catálogu urbanísticu dientro del so apartáu d’elementos naturales, aprobándose l’ampliación de protección a nuevos exemplares que nun taben incluyíos.

Convocatoria beques comedor. Sustituiránse les actuales ayudes pa subsanar los gastos de comedor escolar por una convocatoria abierta de beques. El modelu de convocatoria de beques ye más xustu pa tola población que pudiera acceder a elles, yá que delles families que podríen beneficiase d’ayudes nun lo tán faciendo, en munchos casos por desconocimientu, ya que nun son usuarios de los Servicios Sociales.

Cobertura plaza de Trabayador/a Social. Ye una plaza creada dende l’añu 2009 y que nunca se cubrió. Si estes necesidaes taben xustificaes nel añu de la creación, con muncha más razón anguaño yá que munches families tán en situación de riesgu d’esclusión social por circunstancies sobreveníes a causa de la crisis.

Estación de midición mediuambiental móvil. Compra d’estación de midición ambiental móvil pa integrala na rede pública. A pesar de ser ún de los conceyos más contaminaos, Carreño tovía nun cuenta con un estación pública de medición. Todes les existentes dependen de les empreses. Por esta razón van invertise 118.000 euros nel control de la calidá del aire.

Subvenciones reparación horros y paneres estilu Carreño. Pa defender y protexer el patrimoniu etnográficu de Carreño, hai que sofitar los llabores de meyora y caltenimientu de los horros y paneres. Convocóse una nueva llinia de subvenciones dando prioridá a aquellos elementos de mayor valir históricu, cultural o arquitectónicu, como son los d’estilu carreño. Dotaráse una primera llinia con 15.000 euros pudiendo incrementase en función de l’acoyida.

Factoría musical de Carrió. Puesta en marcha de la primer fase del proyectu de Factoría Musical en Carrió, proyectu ellaboráu cola participación de los colectivos destinatarios. Partida específica de 140.000 euros pa desarrollar una primer fase del proyectu, nun ala de la planta baxa.

Instalaciones cabo’l campu La Mata. Construcción de servicios públicos y adecuación del cierre perimetral nes instalaciones cabo’l Campu La Mata. Executase con cargu a la partida d’Instalaciones Deportives, incrementándola en 14.000 euros. Estes actuaciones, xunto cola construcción de les grades, taben dientro de les propuestes más votaes nos presupuestos participativos. Recuperamos una parte de la inversión más asumible y urxente.

Acondicionamientu del solar d’Inocencio Rodríguez Solís. Por fín van entamar les necesaries obres d’urbanización del entronu. Pasu peatonal y escalera pa comunicar los dos niveles qu’hai dende Muyeres de la Paxa con Severo Ochoa. Llimpieza del llau este de la parcela, incluyíu treslláu del horru dando continuidá al aparcamientu. Igua del vial d’Inocencio Rodriguez Solís con anchu de cai normalizáu y ceres. Eliminación de la tapia qu’arrodia’l solar asitiando barandes.

Ganar espacios más saludables. Abriose un alderique mui necesariu, sobre’l modelu urbanísticu de Candás y la so rodalada. Cuestionose públicamente la prioridá que se tá dando actualmente a vehículos motorizados frente a peatones y otres alternatives de movilidá como la bicicleta, especialmente n’espacios como el muelle y el paséu marítimu.

Mociones presentaes y aprobaes

Moción pa realizar un estudiu de salú sobre la población de Carreño y emisión d’un informe sobre la incidencia del ruíu nes zones poblaes más afectaes del nuesu conceyu.
Moción de cuentes abiertes nel conceyu de Carreño.
Moción de sofitu pa esixir una nueva llei reguladora del derechu a la vivienda, que cubra les midíes de mínimos pa facer frente a la emerxencia habitacional.
Moción Pautu Social pol Agua.
Moción-Declaración de Conceyu Opuestu al Tratáu Tresatlánticu de Comerciu y Inversiones (TTIP).
Moción pa la reconocencia de la declaración responsable na tramitación de prestaciones económiques nel ámbitu municipal.
Moción-Declaración del 8 de Marzu de 2016.
Encamientu. Desarrollu por parte del conceyu de campaña informativa sobre cláusules bancaries abusives.
Moción pa la instalación d’un contador d’asesinatos machistes en Candás.
Propuesta de sofitu al paru internacional de muyeres del 8 de marzu de 2017.
Moción pa la cobertura de la plaza de responsable del Serviciu de Normalización Llingüistica de la Mancomunidá del Cabu Peñes.
Moción pa pidir l’espublizamientu del llistáu de factures de proveedores municipales.
Moción conxunta SOMOS-IX de refuga del usu del glifosatu en llugares públicos.
Moción pa pidir a la Conseyería de Servicios y Derechos Sociales la convocatoria pública que dexe llograr el Certificáu de Profesionalidá nel ámbitu de l’Ayuda a Domiciliu.