SOMOS CARREÑO PRESENTA UN RUEGU NEL PLENU DE XUNETU PIDIENDO ENCAMENTAR AL GOBIERNU DEL PRINCIPÁU A QUE TOME MIDÍES PA CORREXIR LOS INCUMPLIMIENTOS DE LA EMPRESA ALCOR SEGURIDÁ

La empresa ta encargada de les llabores de vixilancia na Ciudá Residencial de Perlora

El diputáu de PODEMOS Asturies, Héctor Piernavieja, fíxonos llegar nel mes de xunetu una denuncia pública apurrida na Xunta Xeneral del Principau pola Asociación de Vixilantes de Seguridá Privada (AVISPA). Nel escritu que nos unvió Héctor, denunciábense les condiciones de precariedá llaboral ya inseguridá nes que trabayen los vixilantes de la Ciudá Residencial de Perlora, pertenecientes a la empresa ALCOR Seguridá.

La selmana pasada axuntamos con esta asociación en Candás. Tuvimos presentes Héctor, Mer Prada del CCA de PODEMOS Asturies y dellos conceyales de SOMOS Carreño. El representante de l’Asociación foinos esbillando de manera clara los incumplimientos del contratu ya irregularidaes, en materia de seguridá privada, nes qu’incurre la empresa de manera siguida nos postreros dos años. Apurriónos el mesmu escritu que rexistró na Xunta y que diba dirixíu a les Conseyeríes de Presidencia y Patrimoniu, como propietaries del contratu cola empresa de seguridá qu’empresta los sos servicios na CR de Perlora. Nél detállense denuncies énte la Unidá Territorial de Seguridá Privada de la Policía Nacional por non impartir los cursos añales de reciclaxe a los vixilantes asignaos al serviciu. Tamién se denunció énte la Inspección de Trabayu y Seguridá Social por non apurrir la uniformidá afayadiza a cada dómina del añu, como ye la so obligación; y énte los Xulgaos de lo Social por despidos improcedentes. Tamién se demanden a la empresa cantidaes debíes a trabayadores subrogaos dende fai más d’un añu. Foi conocíu va dellos meses el llamentable estáu del vehículu col que tienen de realizar n’ocasiones el serviciu el trabayadores, ensin calefacción, con grandes furacos na chapa y fora de toa regulación ensin la ITV pasada. A lo último, tamién se denunciaron na Inspección de Trabayu y Seguridá Social turnos de trabayu abusivos impuestos pola empresa a los sos trabayadores.

Al términu de la xunta alcordamos faer presión y dar visibilidá a les denuncies de l’Asociación AVISPA. Per parte d’Héctor Piernavieja, rexistró una entruga na Xunta pa respuesta per escritu que podéis ver nesti enllaz (Entruga Héctor Piernavieja Xunta Xeneral). SOMOS Carreño presentó nel plenu de xunetu un ruegu pa que dende la Casa Conceyu de Carreño encamentar al Gobiernu del Principau d’Asturies a que lleve a cabu les aiciones oportunes para correxir los repitíos incumplimientos del contratu per parte de la empresa ALCOR Seguridá na Ciudá Residencial de Perlora. Nesti enllaz puedes ver el testu del ruegu que s’apurrió al plenu. Ruegu Seguridá Privada CR Perlora